SUAL KHAWI NGAM
– Lawmsanga Pautu
‘Chutichuan, chhumpui nasa tak ang thlirtuten min hual vel avang hian, min tihnawk apiang leh sual keimahnia bet tlat chu i dah ve ang u’
Tum khat chu Group TKP Leader a ka awm ve lain sumtuaknan Tlawng kam ah Pu Zamzama (fam) leh Tv. Sawma (fam) te kaihhruaina in kan ramchhuak a, ramchin an lo hre bawk a, Tumbu tamna hmun ah min hruaiin hlawhtling takin kan ramchhuak thei a ni.
Hemi tum hian haw kawngah tumbu, mahni zawh tawk theuh hawn angai a, tichuan ka ipte ah chuan ka ipte in a zawh tawk tur vel tumbu dahin ka ak chhin a, rit ka ti lemlo khawp mai. Tlanpui pawh ngaise ka tlanpui pap pap thei ang tih ang vel tur ak chung chuan kan haw ta a.
Ngaiteh, haw lam chu kallam nen alo in ang ta reng reng lo mai a, kallam a kan kallai pawh ka hriatloh tur hlir kawng chho ah hian kan kal ta char char ni ber hian ka hria. Kallam kawng a thui vakloh tehreng nen hawn lam kawng erawh chu a let engemawzah a thui ni hian ka hre ber. Ka tumbu ah lah chu luikam a kan awm laia rit ka tih loh tehreng nen ‘a inti rit thei aniang’ tih tur ang mai hian a rih belh zel bawk si.
Kawng chanve vel chiah kan la kal si, ke pen lah a nghet thei tawh mang silo. Chutia mangang rilru tak, tumbu paih then mai pawh hnial tawh manglo rilru pu a ka awm lai chuan Tv. Sawma (fam) chuan ka harsatna a rukin min lo hmu reng lo niin ka bulah a rawn kal a, ‘I tumbu kha a tam em anih kha, ka lo la then ange’ tih pahin engemawzah a rawn la then a, tin, tiang hawl tur te min suih sak bawk a, tichuan mualpho lovin In ka thleng ve thei ta a ni.
Famkimlohna khawvela khawlohna a din kan ni. Pianpui sual piahlam ah hian thil sual engmah la tilo chu kan awm kher awm love. kan ringtu nun min tibuai phalo ni a kan hriat, sual ho te anga kan ngaih thil hi kan nun pawtthlu tu ani thei tih hi kan ngaihtuah ngai em le?
A tir ah chuan rit pawh ti lem lovin kan kalpui ve char char thei ang. mahse kan nun atanga paih bo mai lova hmun kan chantir reng thung chuan a tuar tu tur chu midang ni lovin keimahni ngei hi kan ni.
Lalpan Malsawm rawh se
