THU THILTITHEI PATHIAN THU
– Lawmsanga Pautu
Daniela chuan Pathian thu chu Sakeibaknei puk a luh pui a, a luh pui Pathian thu tho chuan Sakeibaknei lakah pawh a veng a, puk atangin a chhuahpui leh a ni, Pathian thu avangin Sakeibaknei puk thleng mahse Pathian thu tho chu Sakeibaknei puk atanga hruai chhuaktu a ni leh tho.
Pathian thu a ke kan pen thui poh leh Pathian thu thiltihtheihna hi kan hmu hnem mai dawn a ni, Pathian thu avanga Harsatna, tawrhna hmun kan thleng a nih chuan, Pathian thu tho chu, chu hmun atang min khai chhuak leh tu pawh a ni ang.
Sadraka, Mesaka, Abednagoa te thian thum pawh khan Pathian thu an din pui tlat avangin meipuiah paih luh an ni a, meipui chhung an dinpui Pathian thu ngei chuan a dinpui ve tlat thung a, Mei a an luh pui Pathian thu ngei chu mei thiltihtheihna lak atanga chhanhimtu pawh a ni tho a, chu meipui lak atanga la chhuak leh tu pawh an luh pui Pathian thu tho kha a ni.
Pathian thu kan awih avang hian hloh tur tam tak kan nei a ni mai thei, mahse chu hlohna hmunah chuan chu Pathian thu chu min awmpuitu a ni tho thin, Pathian thu ah chuan kan mamawh, kan rin phak baka thiltha a awm thung si a ni, Pathian thu avanga kan duh zawng kan kalsan na hi Lalpa hian a theihnghilh reng reng lo, kan kalsan tak aia tha kan hmaah min hlui a duh zawk a ni.
Abrama hnenah, a lai chinte, a pa in, a khua zawng zawng kalsan turin ti mahse a thlawna kalsan ngawt turin a ti lo, a thu pek anga a kalsan aia tha thutiam a nei zawk a ni, Lalpa rinchhana ke kan penna ah hian kan duhthusam ni lo Lalpan kan tana a duhthusam kan hmaah a awm reng zawk a ni.
Chu hmun thleng tur chuan kan duhzawng te, kan chak zawng te kal sana, a hrehawm deuh a nih pawha pawisa lova Pathian thu chu din pui tlat turin min duh zawk a ni, Ram tha lehzual kan tana a buatsaih hi he leiah ngei pawh hian kan tem lawk a phal êm êm a, chu hmun chu thuawihna hmanga kai theih chauh a ni thung si.
Pathian thu hi huai taka kan din pui ngamna hmun apiangah Pathian thu hi Pathian thu a nih zia kan hmuin Pathian thu chuan min dinpui zel zawk dawn a ni.
Pathian thu avanga hrehawm i tuar a nih chuan Pathian thu avang vekin hrehawmna lak atang chuan chhanchhuah in i awm ang, Pathian thu avanga retheihna kawng i zawh a nih chuan Pathian thu chu i hausakna niin chu Pathian thu vek chuan dinhmun duhawm zawk a hmuh tir ang che, Pathian thu hi i nun khalh kaltu a nih phawt chuan khawi hmunah mah a phatsan ngai lovang che, hrehawmnaah emaw lungngaihnaah emaw, retheihnaah emaw, natna hmunah emaw pawh nise chu hmunah chuan a tel ve zel ang a, i ding leh veiah a chelh ang che a, i hmahruaiin i hnung a dawl ngei ang.
‘Lalpan Malsawm rawh se’
