ISUAN RO A REL
Lawmsanga Pautu
Bible-ah Israel te chu Pathianin a fa atan a thlang a, an chungah duhsakna leh khawngaihna a lantir thin tih kan hmu. Nimahsela, Israel mite chuan lawmna chang an hre chuang lo. Aigupta ram atangin Pathianin a hruaichhuak a, chuti chung pawh chuan Lalpa lam an hawi duh chuang lo. Chu mai bakah he hun lai hian rorelna dik an tlachham em em a. Hei hi Lalpa duh loh zawng a nih avangin Zawlneite hian an dem nasa em em a ni. Lal Ahaban Nabotha lunga a den hlumtir hnuah a grep huan a chhuhsak thu 1Lalte 21-ah kan hmu a. Amosa bung 2 thuah Israel mihausate duhamzia kan hmu, khawngaihna tel hauh lovin mi retheite an rapbet a, chutiang chuan sualna a nasa em em a ni. Zawlnei te chuan thahnem ngai takin Pathian lam hawi reng turin Puithiam leh mipuite an fuih thin. Amaherawhchu an awih duh loh avangin hremna chu an pumpelh thei lo a ni.
Pathianin a phut chu rorelna dik a ni. Chu rorelna chu luipui angin luang sela, felna chu luipui kang ngai lo angin luang rawh se, tih a ni (Amosa 5:24). Rorelna dik chu Pathian duh zawng a ni. Tunlai kan ram dinhmunah pawh hian Pathianin kan ram hruaitute laka a phut chu he rorelna dik tho hi a ni. Kan Pathian chuan mi retheite chungah leh hreawm tuar, pachhiate chunga dik taka rorel hi a phut tlat a ni.
Kan tunlai kohhran dinhmun pawh hi han enin, han chhut ta ila, kohhrana Pathian rawngbawltute hian kan mite thlarau nun hi kan hmangaih tak tak em? Chumai bakah kan member-te hian mi dik ka ni tih hriain min ring tawk em? Keimah ang rilru leh ka thahnem ngaihna ang hi ka hruaitu nise ka ring ngamin ka awmna kohhran hruaitu atan ka lungawipui angem? tih hi lo chhut teh ang. Chu chu a bikin rawngbawltute tan a ni. Kohhran inlungrual leh inhmangaih ni tur chuan a tuate pawh mai hian kan thil thlir leh kan ngaihtuahte hi han dik phawt mai se, chuta tang chuan inpumkhatna a lo chhuak theiin ka ring a ni. Mi dik leh rinawm bulah chuan tupawh mai hian thiltih sual palh kan hlau em em thin.
1Korinth 4:1-2 ah chuan Keini ho hi Krista rawngbawltuah leh Pathian thuruk enkawltuah miin min ngai rawh se. Hetah hian enkawltu chu mi rinawm nih a ngai bawk a ni, tih kan hmu a ni. Pathianin a rawngbawltu atan mi rinawm leh dik a duh a ni, a chhan chu kan Pathian hi Pathian dik leh rinawm a ni.
Puithiam Elia fapate sualna chu Lalpa mithmuhin a lo nasa ta em em a, mite chuan Lalpa hnena inthawina hlante chu an lo ngaihnep phah a ni (I Samuel 2:17). Kohhran hruaitute chungah mipui mit a fu tih hriain hruaitu chuan dik leh felt akin a ti thin tur a ni. Mi zawng zawng hian thian kawm bik kan nei theuhin a rinawm a, amaherawhchu kan rawngbawlnaah hian mi thenkhat chauh thurchhuakin, mi dangte kan hlamchhiah chuan rawngbawltu hlawhtling tak kan ni thei dawn lo a ni.
Thufingte 14:31-ah chuan Mi rethei hnehchhiahtu chu a Siamtu hnehchhiah a ni a, Tlachhamte khawngaihtu chuan a chawimawi a ni, tih kan hmu, Pathian fak leh chawimawi fo hi kan tih tur a ni a, tlachhamte kan khawngaiha kan tanpui hian Pathian kan chawimawi tihna a lo ni. Kan chunga thil tha titu leh min duhsaktute hnena thil tha tih leh duhsakna hlan let chu thil har lo tak leh thil nuam tak a ni zawk hial ang. Amaherawhchu, a mamawhtu hnen thleng phak rawngbawlna hi Lalpa min kohna a ni. Chutiang ang ni thei tur chuan Pathian nen thuhnuairawlh tak len dun a ngai a ni. Chuta tang chuan midangte hmangaih thei turin Lalpa’n tlawmna min neihtir thin. Chumi ang nun nei tur chuan ngaihsak duh zawng leh hmelhriatte chauh ni loin min mamawhtu hnenah hmangaihna nun min neihtir thin a lo ni.
Lalpan Malsawm Rawh Se
