MIN TI DAM DAWNLO MAHLA
– Lawmsanga Pautu
“Kan Pathian, a rawng kan bawl thina chuan he rawhtuina meipui ata hi min chhanchhuak thei si a, i kut ata pawh aw lalber, min chhanchhuak mai ang. Chuti lo pawh ni sela, aw lalber, i pathiante rawng chu kan bawl dawn lo va, i rangkachak mi lim din pawh chu chibai kan buk hek lovang tih hi hria ang che,” – Daniela 3:17-18
Kumhnih liamta vel khan tumkhat chu mimal hriselna ah harsatna deuh ka neih avangin TKP Programme pawimawh tak ka tel theihloh ka hlau viau mai a, tichuan Pathian hnen ah damna dilin ‘Aw Lalpa, he hun ah hian tel ve ngei ka duh si a, ka natna hi min ti damla, tichuan ka chanvo pawh ka ti hlawhtling ve thei ang’ tiin ka tawngtai.
Chumi hnu ah chuan ka rilru ah TKP a kan Group hrang hrang hming Sadraka Group, Mesaka Group leh Abegnegoa Group te rawn langin hriat fo tawh hnu mah nise tiin Bible ah Daniela bu ka han chhiar a, Sadraka, Mesaka leh Abednegoa te lo ropui zia hmuchhuak thar in Rawhtuina meipui ata chhanchhuak theitu chu Pathian chauh ani tih hria in amaherawhchu ‘chhanchhuak dawnlo mahse’ lal dang chibai buk an tum hauhlo!
Ringtu inti tam tak te hian harsatna kan tawh hian ‘Lalpa, min ti damla, i rawng chauh ka bawl tawh ang’ te kan ti thin, alo ropui lo hle mai. Daniela thiante pathum kha chuan thihna an hmachhawn laiin Pathian hian chhanchhuak dawn lo mahse Pathian phatsan an tum chuanglo.
Pathian rawng kan bawl ve thin na te hi anihna taka sawi chuan keimahni tan vek zawk alo ni. kan rin Pathian hi ‘Chu chu min tihsak la, chu chu ka tihsak ve ang che’ ti a dawr tur kan ni reng reng lo.
Rawhtuina meipuiin a ngamloh chu Pathian kha a ni a, Lalpa a awm tlat te chu engmahin alo ngamlo mai thin alo ni. Daniela thiante pathum khan Pathian an rinna avangin tawrh an thlang a, an hnena Pathian awm chu meipuiah an luhpui a, an hnena Pathian a awm tlat avangin meipui chuan awmzia a nei ta lo.
Harsatna hrang hrang tawh chang a awmlo theilo anga, kan hnena Pathian a awm avangin kan tawrhna ah thlirtute hmuh theih turin Pathian ropuina alo lang zawk dawn alo ni. Meipui chhunga Daniela thiante pathum kang miah lova an awm ang khan harsatna engpawh Lalpa avanga kan hmachhawnna ah hian amah Lalpa chu kan himna alo ni.
Daniela thiante pathum kha chuan Pathianah chauh rinna an nghat a, amahah chauh beiseina an nghat. Chu rinna leh beiseina an nghah chu hlawhtling dawn lo mahsela an chan ngamna nun tak mai hi a ropui. He khawvel thila ropuina leh hlawkna chan ngama; Pathian hnathawh kan beisei tlatna hmunah hian ani Pathian ropuina puanchhuahin a awm thin ni.
‘Min ti damla, theihtawp in i rawng ka bawl tawh ang’ ti thin ringtu ni lovin ‘Min tidam theitu, ka harsatna min sutkian sak theitu Pathian i ni takna in min tidam lo mahla, i rawng chu ka bawl zel tho ang’ ti thin ringtu nih theuh i tum ang u.
Lalpan Malsawm Rawh Se
