KA THLARAU ZAWKIN LE
(Kumthar thuchah)
Lawmsanga Pautu
(‘Chakna ni lovin, thiltihtheihna ni hek lovin, ka thlarau zawkin le, tiin Sipaihote Lalpa chuan a ti e’ – Zakaria 4:6b)
Pathian khawngaihna leh venna a zarah Kum 2015 kan lo chuang chhuak leh dawn ta reng mai a, hei hi Pathian khawngaihna azar a ni a, Kum in chhung a min kaihruai tu leh kumthar duhawm tak min hruai thlengtu Lalpa chu fakin awm rawh se.
Kan changthlan Zawlnei Zakaria 4:6 thu ‘Ka thlarau zawkin le’ tih hi nikum lama TKP ten kan thupui a ni a, heta hming lo lang Jerubabela hi Lal Davida thlah a mi a ni a, Judai ram Lal a ni. Hetih lai a an Puithiam Lalber chu Josua a ni a, Josua hian Jerusalem Temple din turin thu a pe a, mahse dodaltu leh sawisel a dotu tam tak an awm a, chutianga harsatna nasa tak an tawh takah chuan an chakna leh an thiltihtheihna chuan an dinzo dawn a a lan tak loh avangin Lalpa a rawn che ve ta a ni. Lalpa ‘Thalarau Zawkin’ hmalak thu anpuana, Lalpa thlarau hruaina a hma an han lak taka tang chuan Jerusalem Temple chu dinthar leh a lo niin Ropui leh mawi takin sak zawh in a lo awm ta a ni!!
Pathian hruaina zar ah kumthar kan lo chuangkai chho leh dawn ta reng mai a, Kumthar kan la hman ngai loh leh kan la hmuh ngai lohah hian Nang leh Kei hian tihtur pawimawh leh chanvo hlu tak chu kan nei leh ngei ang. Kha leh chen kha Chakna leh Thiltihtheihnate hmangin puitlin tumin kan lo bei ve hle tawh thin pawh ani thei. Mahse an puilting zo loin rah chhuah loin hunin a liampui zo leh ta, hengte hi a chhan leh avang chu Khawvel ropuina leh Nawmna ten an dodal leh an chimral thin avangin kan chanvo kan kova tlu ngei pawh an lo hlamzuih leh thin a ni.
I nun ngeiah pawh nangmah leh nangmah i beidawng ru a, kohhran leh khawtlangah pawh beisei an bo zo vek te pawh ani thei e. Mahse beidawng reng reng suh, Chungnungbera chuan alo thlir reng che a, i felna te, finnate, i chakna leh i thiltihtheihnate chhuan tlak engmah alo awm lo tih i hriat hunah chuan Lalpa Thlarau zawka chetchhuah a hlutna leh a tangkaina i hre ngei ngei dawn a ni.
Puithiam Lalber Josuan Jerusalem temple dinthar a tum ang khan i nuna Lalpa Temple din puitlin theih loh leh, i chanvo puitlin zawh loh leh i hlimna puitling ngei lo kha i finna leh felna leh chakna hausakna leh thildang nangmah a ilo chhuan ve zawng zawngte ai khan Lalpa thlarau zawk hmachhuana hmun i ken thiam chuan Lalpa thlarau chuan in nun tipuitling tur leh rinna Temple nangmahah din puitlinin a lo awm tawh ang a, hneh theihloh nun in nangmahah ro a rel tawh ang a, thlamuanna rehtheilo neiin, nangmah tichaktu leh i nunna Thlarau avang chuan Engkim ti thei ilo ni tawh zawk ang. He chakna thuruk hi i chhar a i nei a nih chuan nangmah dotu leh beitu, sawiseltu chu i tan chawtui ber an lo ni zawk tawh dawn a ni.
Jerusalem Temple pawh dotute tam tak karah din puitlina a lo awm a, dotutte leh sawiseltute tihborala an awm ang khan, i rilru leh Thlarau zawng zawng Lalpa hnena i in hlan chuan Lalpan nangmahah a chakna leh ropuinate a lantir anga, ringtu puitling hnathawk thei ilo ni tawh dawn a, Rinna Kanaan ram chu ilo luah ve tawh dawn nia.
Lalpan malsawm che rawh se.
