Dt. 29th November zingkar ah Siliguri leh Guwahati a bazar haw turin zingkar ah Gangtok khawpui kan chhuahsan a, Gangtok leh Bagdogra inkar ah hian Flight Service a awmloh avangin by road in Bagdogra pan niin, Siliguri ah zan riah tum a ni. Tichuan, zing dar 7:30 velah kan thlenna Hotel Ninamma chu Bye bye in Siliguri panin motor pakhat hire a ni a, Siliguri hi Dar 1:00 PM velah thlen a ni. China market a Bazar kan duh avangin a bul hnai Hotel phone atangin kan han zawng chawp a, Hotel Niladri bia in kan han lut rawih mai a, a Hotel alo nuam in an smart viau mai.
Tichuan kan inbual sawk sawk a, Shopping turin kan chhuak darh ta sang sang mai. Kei leh thianpa Mala hi room khat ah kan thleng a, kan pahnih in kan chhuak a, kan nula pahnih Pi Manuni leh Pi Tluangtluangi te a hranpa in an chhuak bawk. Mipa dang erawh an vaiin an chhuak thung. Kan zingah hian Pu Samu-a hi Shillong khawchhuak, shillong a seilian anih avangin tawng lamah kan tangkaipui khawp mai. Duh duh lam hawia Bazar tura chhuak kha kan han vak kual tak tak mai chu zan dar 9 velah chuan kan vaiin kan inhmu ta dal mai. Keipawh in ka tute ho thilhawn tur hrang hrang ka leikual ve a, Christmas dawn te a ni bawk a, Lukhum lum ka han leisak theuh teh ang tiin Lukhum a te ber (kum 3) atanga lian ber (Kum 15) thleng khum tur ka lei nghek mai. In haw hnu ah ka lukhum leisak hi an khum dan dan a, a size ka lo hisap sual viau mai niin, a lian ber khum tur a ka lei hi a te ber in a khum tawk chiah tih erawh sawilang lo mai ila. 😊
Dt. 30th November zingkar ah hma taka thovin kan insiam sang sang a, Bagdogra airport pan nghal in, Bagdogra airport panna ah Guwahati kan thlen huna kan Hotel thlenna tur te Online a book nghalin, Guwahati hi Dar 2:00 PM velah kan thleng. Tichuan, kan Hotel book sa, Dr. B Baruah Road, Ulubari a mi Hotel Prince B ah chuan lut nghalin, amaherawhchu Room erawh beisei alo pha chiahlo deuh a, ka thlen nawn tawh ka ring chiahlo deuh.
Hotel atangin Shopping turin a hran hranin kan han chhuak leh ta phauh phauh a, Pu Awitea’n “Hei chu ka nghawng len ve na hmun a ni” a tih hmun ngei ah chuan ke in kawng min bo pui ta! Paltan Bazaar a kal tur si khan Arrow mark in a kawhna lam lo zawk ah kan kalpel phei ta vuk vuk mai a, a dik chiah lova kan hriat thu kan sawi pawh khan Confi laklawh tawh tlat si. Rei ngial kan zawn hnu ah kan thlenna Hotel bul lawkah kan chhuak ta a, tichuan Cab te hire lehchhawng in thui tak kan tlan hnu ah Paltan Bazaar entry ah ngei chuan min drop ta.
WhatsApp Group ah Live location share chungin kan han kal darh ta sang sang mai a, thenkhat duhzawng hmuh hmasak apiang lei nghal tum zel chi te, engmah lei ngam lo chi te, dil tlawm tum lutuk chi te, dil tlawm tum miahlo chi te, kan awm nuaih mai. Hah hnep khawpa kan bazar hnu chuan haw in, a tuk lama Lengpui kan haw na tur atan kan Luggage te kan han buk a, kan excess nasa kher mai. Hand baggage atan a tam thei ang ber kan lak then pawhin kan la excess teuh tho a, chawibelh inhuam mai ang u tiin thutlukna kan siam ta ringawt.
1st December, 2020 zingkar a ni a, Dar 1 :15 PM a flight tur kan nih avangin kan hmanhmawh lutuk lem lova, Pu Awitea’n Guwahati Zoo kal a rawt ta tlat pek a, Hun kan la nei tho a kan ngaih avangin Zoo kal a khat deuh bawk nen, phur takin Zoo kan kal a, rin aiin kan lo awm rei deuh aniang, kan haw, kan hotel kan thlen meuh chuan Airport lama in report alo hun der tawh mai a, hmanhmawh lutuk in Ola Cab kan book hmangin Airport kan pan ta.
Dar 1:15 PM a thlawk chhuak tur niin Dar 12:20 ah Hotel ah kan la awm. Kan hotel thlenna atanga Airport inkar hi minute 50 tlan vel a ni. Cab driver hnenah chak thei ang ber a tlan turin kan ngen a, tichuan speed chak tak maiin Airport lam kan pan ta. Chutihlaiin harsatna kan tawk ta, kan hmuh theih tawp thleng chuan Motor alo ding phei vek mai. Traffic alo Jam nasa lutuk niin, horn hmet ri nuaih nuaih karah motor chu tlem tlem in a tawlh ta hlek hlek mai. Beisei a bo chiang ngei mai.
Motor pahnih a kal kan nih avangin keini a hmasa ah kan kal a, a hnunglama rawn tlan te an rawn mangang tawh bawk nen, Sona kan bih chhen, thlawhna thlawhchhuah a hun titih der tawh, keini lam lah Traffic Jam ah kan la tang nasa mai si a, motor lah tlem tlemin a che det det ringawt mai si, a beidawnthlak duh khawp mai. Traffic Jam avanga minute engemawzah kan tan hnu ah phei chuan beisei a bo ta viau mai a, vawiin lam hi engtin nge hun kan hman ang? Naktuk flight ticket man engzah nge? Tih vel ngaihtuahin rilru kan la peng ta a, Vawiin ah Accoland ah nge kan kal ang Science Museum zawk tih thlengin rilru a insual tan.
Chutihlaiin Airport kan thleng ta si a, theihtawp chhuah in han dil ve hrim hrim ang u tiin kan Luggage kha Pu Lcha leh Pu Tepuia ten lo buaipui ru tiin, keini Pi Tluangtluangi nen hmanhmawh lutuk in kan tlan lut nghal a, kan flight check-in counter kan thleng. Hmeichhe lo thu khan “in tlai tawh” tiin hriatthiam min dil a, Last call a nihna pawh a rei lutuk tawh tiin. Keini khan Traffic Jam vang anih thu sawiin, min kaltir hram turin kan ngen a, a ni lahin tih theih kei chuan engmah ka nei tawhlo tiin, an Senior te min biak sak a, a theih ang tawk in a ni pawhin min sawisak hnu ah “Sir, in bungrua in buk tawh em? Tunah nangni pahnih chiah chu phalsak in ni e, in bungrua rawn la nghal ula, hmanhmawh rawh u” tiin min chhang. A lawmawm viau rualin thiante Motor pakhat zawk a rawn la thleng ve silo, chutah kan bungrua lah Pu Tepuia ten buk turin an buaipui mek bawk si.
(PART 4 ah chhunzawm a ni e.)
