Darzo hi Lunglei atanga Km 80 vel leka hla a awm a ni a, Hnahthial RD Block huamchhung, khaw lian lutuk lo, In 250 vel awmna khua a ni. Kan kallai hian kawnglaih lai a nih avangin kan tlan chak vak theilo a, darkar 4:30 vel kan tlan a ni.
Kan thian zaho ‘Circle of Friends’ hian kan thianpa Makima, Aizawl lama sawrkar hnathawh vanga awm, alo hawn huna Camping neih hi hun rei tak atanga kan lo tum tawh niin, Krismas laiin alo haw dawn tih kan hriat avangin he hun remchangah hian Camping neih tumin ruahmanna kan siam ve a ni.
Kum 2020 hi keimah bikah phei chuan March thla laihawl atangin Covid19 boruak avangin lohtheihlohna in ka duty kumtluan hi a ni ringawt mai a, rilru han tih thawven a, he hripui leng vanga nun zalen lo reng renga awmna atanga han hawi thawven ve hi ka dream a ni thin.
keimah ang bawkin ka thiante pawh hian chutiang chu an chak ve a, tichuan Makima lo haw hunlai remchang a la in, Dt. 29.12.2020 khan zankhat riak turin darzo lam kan pan ve ta a ni.
kan zingah Duhawma, Duhkimi leh Abrahama an tel ve theilo a, Marina, Makima, Rinkima, Thlengi, Nunoi leh Kei kan tel thei thung. zing dar 9:30 vela chhuah tumin ruahmanna kan han siam ve a, keini thian zaho hun fix hi chu kan time zone alo dang deuh nge, dar 11:30 velah kan chhuak thei hram.
Motor pahnih kengin, motor pakhat ah bungrua phur in, motor pakhat ah a mihring lam kan in phur thung a, hmanhmawh vak lovin kan tlan a, Maudarh ah Thingpui te kan in hnu in, kan tum lam panin chawl khawmuang vak lovin kan tlan a, dar 4:15 velah Darzo tlang hi kan thleng a ni.
Darzo Tlang kan thlen hian khua a thim tep tawh avangin hmanhmawh takin kan Tent te zar in, eirawngbawlna tur te kan siamfel zung zung a, a thenin mei te lo chhem nghal in, dar 5:00 velah kan awmhmun tur kan bengbel fel thei. Kan thing ken hi alo tlem deuh hlek avangin khua ah zuk kalin, Thlengin a hmelhriat te Thing lei a zuk dil a, zankhua daih tur thing ai tur kan neih theih phah a ni.
Darzo hi Thlengi pa te khawhlui South Vanlaiphai bul lawk anih avangin Thlengi hian hmelhriat tam tak alo nei sa a, kan tangkaipui hle tih ka rawn thailang tel hrim hrim e.
Tin, Darzo tlang kan riah zan hian Lunglei lama kan thianpa Cobtea te (Dengro print) an chhungkua in an rawn kal ve a, kan riahna thlang deuh ah an rawn riak ve. an zuk riahna hi a hlat ve deuh avangin kan zuk pawh ta chiahlo.
Tichuan zanlam ah Light kan neih that tho avangin hmanhmawh lutuk lovin eirawng te kan bawl a, thalai rual kalkhawm tih takah Thlalak thupui ah dah in, thla kan han la kual zak zak bawk a, zan dar 8:30 velah chaw kan ei thei hram.
Chaw eikham hnu hian Thlengi hmelhriat te In ah tuichawi pahin kan zuk inthiar a, tui hi mineral water case 1 mai bakah eirawngbawlna tur Litre 40 zet kan keng takna in min daih dawn lo a kan hriat avangin kan zuk chawi belh a ni. Tin, a tlang ah hian inthiarna tur Zopa Ek In (Pit Latrine) chu a awm tho takna in kan hmang thang hlawm vaklo deuh nen, hmelhriat te In ah kan zuk inthiar ta zawk a ni.
Zan dar 9:40 velah kan haw chho a, meilum ai pahin hla kan play a, Makima’n a talent neih rawn show in pum na vek khawpin kan nui. Hemi zana kan thianza ho hun hmandan zawng zawng hi rawn ziahlan vek chi a nilo a, chutihlaiin Kum 2020 chhunga ka hlim ber zan leh ka nuih tam ber zan a ni tih erawh ka rawn thailang hram teh ang.
Zanrei pawh sawi thei lovin hlim takin hun kan hmang a, zinglam dar 3 velah pawh ‘Makim, ka pum a na lutuk tawh, sawi tawh suh’ ti khawpa kan nuih uarh uarh hnu in mut zai te kan rel ve ta a ni.
Zingah dar 7 velah ka tho a, ka thawh veleh Darzo tlang video clip tur la kual nghalin, zanlama kan hmuh aiin khaw en hnuah chuan a tlang alo mawi lehzual a, boruak a nuamin thlifim a thaw heuh heuh reng bawk nen, rilru hi a hahdam sawng sawng thei.
Video Clip ka la zo, ka let leh chuan eirawng an lo bawl mek a, dar 8:30 velah zing chaw eiin, kan eikham veleh kan hmunhma te kan han tifel a, bawlhhlawh pakhatmah hnutchhiah loh kan tum avangin Center Fresh kawr thlengin kan chhar fai vek a, Purun kawr takngial pawh avaiin kan chhar fai vek. Tichuan, kan bawlhhlawhte a paihna tur hmun an siamah paih felin, darzo tlang hi dar 11:30 velah kan chhuahsan ta a ni.
Thlengi hian an khaw hlui, South Vanlaiphai lamah tihtur a neih avang leh keini pawhin va tlawh ve hrim hrim kan chak avangin Darzo atangin South Vanlaiphai lamah kan kal ta a, south vanlaiphai hi Km 15 vel leka hla a ni takna in a kawng a kual em em a, a te em em bawk. tlan chak a har viau mai. darkar chanve chuang kan tlan hial. Tichuan, South vanlaiphai lama kan va kal zuaih hnu in dar 1:00 velah kan haw. Darzo ah Serthlum leiin kan ding zawk tih loh chu chawl hranpa tawh lovin Lunglei lam kan pan.
Kallam ah Tuipui D kan tlan tlanga, kan pen hmanloh avangin hawlam chu Tuipui sangha en tum in kan peng haw a, dar 3 velah Tuipui D hi thlengin, sangha chaw te kan pe a, thla te kan lak hnu in dar 3:30 velah Tuipui atang hian Lunglei panin kan chhuak leh.
Haw kawngah kan ril te a tam ve deuh avangin Maudarh ah bawk Thingpui te kan in haw leh a, tichuan tluang takin dar 7 velah Lunglei kan lut thei. Kei hi In ka thleng tlai deuh ber a, dar 7:40 velah In ka lut.
—————————-x—————————-x—————————-
Darzo Tlang hi ka beisei piahlamin alo nuam a, a boruak a thengthaw nuamin, rilru a ti hahdam sawng sawng thei. Heivang hian Tourism Department lam pawh hian han chei deuh thei se, mizoram tourist spot nuam tak a tling thei hialin ka ngai. He Post chhiartu te pawh hian han kal ve ngei ula, in inchhir lo khawp ang. Tin, bawlhhlawh mawlh kha aw. Sulhnu chhui ngai, bawlhhlawh hnutchhiah nei nilo hram bawk ila.
Video Clip a hnuaiah hian ka rawn dah a, voice hi dubbing niin, ka aw hi a nalh vak lemloh avangin voice ka pe ring lemlo. Music ava ring ve, voice a zawi si i ti anih chuan ‘ka duhdan zawk’ kha ni ve miau sia. 🙂
Tin, a hnuaiah hian kan thlalak thenkhat ka rawn dahchhuak bawk a, thlalak te hi hmundanga thehdarh remtih a nilo thung a, min lo zawmsak hram dawn nia.
Mobile Phone thlalak
https://photos.app.goo.gl/BXQKK8poevR2c1pg7
Mirrorless Camera thlalak
kal ve chak nomhmel ltkk