Happy Birthday to Me 2020

A piang ve ang tih pawh rinhlelh awm rum rum tur khawpa hmel bumro, khawilai kawr ruam vela chhar emaw, lungalhthei khur vela laihchhuah emaw nih duh hmel zawk tak chu, a vawi engemawzahna atan ka pianchampha alo thleng ve leh ta hlawl mai le.

Kumin chu kumdanga lawmdan anglo deuh hleka Birthday han lawm te rilru ah a lut deuh a, thawhpuite nen Cake te han zai a, han lawm a chakawm viau rualin, inthlahrung tak chungin ka Birthday Dream ka thawhpuite bulah ka sawi a, anni in tha min tihpui viau lehnghal a, tichuan kumin ka Birthday chu TNT (Thutak Nunpuitute Team) Centre, Lunglei lamah hun kan hmang ta a ni. Ka thawhpuite hian tha takin min tawiawm a, an chungah lawmthu ka sawi mawlh mawlh a ni.

TNT hi kohhran leh mimal hrang hrangten tanpuina thilpek an pe nasa ve thin viau mai a, Amaherawhchu hripui leng (Covid19) avanga Kohhran leh pawl ang te a sumtuak a harsat tak em avang te leh chhan hrang hrang avang te in, kumdang anglo takin thilpek pe tu an nei tlem viau. He hun hi ‘Midangte tana malsawmna’ tura ka penchhuah ve theihna kawng remchang takah ngaiin Birthday plan ka siam ta a ni.

Tichuan, ka Birthday ni tak, vawiin Dt. 11.09.2020 ah Office te kalin, tlai lamah kan Project Director (Pu K. Lalrohlua) dilin, a niin min phalsak angin kan Room (MIS Staff) ten dar 3:00 velah TNT kan va pan ta a, Motor pahnih (ka Motor NuvoSport leh Bolero) a kalin, kawng duhthusam in a chhe thung. Eitur remchan dan ang kensak in hun hlimawm tak kan va hmang thei a, mimal hming lan duhloh avangin MIS Staff, DRDA tih hmingin Donation pawh kan ziak lut ve.

Tlai ah hmundanga chaw eikhawm hi thil fuh ber niin tun dinhmun ah chuan a lanloh avangin kan thawhpui Velma Restaurant neitu te eitur siam kan Order a, kan Room lamah eitur hi min rawn serve in zan dar 7 velah kan haw darh ta hlawm.

Ka Birthday hman tawh a zawnga ka la hlim ber tum a ni ang. Tin, an Biak In chhung kan luh a, ka rilru khawih deuh tu pakhat, “Kei aiin Isua ka ring zawk” tih, TNT innghahna ber, Papuia (Pu Sangthankima) thusawi chu lian takin an lo tar a, ngaihtuahna a kal thui khawp mai. Mi 400 dawn thaw enkawlna tur atan hian sum engmah a nei biklo. mahse a ni chuan Pathian rinchhan chungin a enkawl a, chawnghei an la nei ngailo.

A tawp berah chuan, midangte tana malsawmna tih hlawhtlin nan, mahni kan insen nasat poh leh kan rilru a hlim tih hi chiang takin ka hre thar leh ta e.

Birthday thlalak en duh tan a hnuaia link ah hian thlalak tam zawk, quality tha zawkin a en theih e.

https://photos.app.goo.gl/BvTw71Lrv2P3iBwX8