LALPA HMAN TLAK

LALPA HMAN TLAK

– Upa Dr. KL Biakchungnunga

(Sir Ma-a (fam) lehkhabu ziah ‘Lalpa hman tlak’ tih hi ka lehkhabu tha tih te zinga mi a ni. Vawiin TKP Day alo thlen hian TKP Day thupui ‘Lalpa hman tlak’ tih anih angin a thuziah tawite ka lo la chhuak e. – Lawmsanga Pautu)

Nimahsela, In ropuiah hian bungbel, rangkachak leh tangkaruaa siam mi chauh a awm lo va, thing leh belleia siam mite pawh a awm thin a; thenkhatte ngaihhlut tur a awm bawk a, thenkhatte chu ngaihhlut loh tur a awm bawk a. Chuvangin, chung thil laka mi a inthiarfihlim chuan bungbel thianghlim, Lalpa hman tlak, hnathawh tha tinrenga inpeih sa, ngaihhlut tur mi a ni ang. – II Timothea 2:20-21

Hman tlak leh hman theih :

Kan thupui ‘Lalpa hman tlak’ tiha ‘hman tlak’ tih hi ka ngaihtuah apiangin ‘hman theih’ tih hi ka rilruah alo lang nghal zat zel.

Bungbel angin lo ngaihtuah ta ila, Bungbel hman tlak, mahse hman theihloh a awm thei tlat. Dawra bel an zawrh lai chu a hman tlak tehmeuh mai. Mahse, zawrh lai anih tlat avangin chaw chhum nan emaw chawhmeh chhum nan emaw kan hmang ringawt theilo. Chutiang bawkin, mihringah pawh hman tlak, mahse hman theihloh kan awm fo thin a ni.

Khawpuia cheng, mi lian leh awmthei deuhte chuan bungbel hman tlak, hman theih loh an nei deuh fur thin. Almirah chhungah, darthlalang phenah bungbel man to tak tak an dah a, Sitting room cheimawi nan an hmang thin. Bungbel hman tlak, hman theihloh, dah mawi mai mai tura lei an ni.

Kristian zingah hian hman tlak, hman loh tur, hun mawi mai mai tura Pathianin a serh hran kan awm thei angem?

Bungbelah hian hman theih, hman tlak siloh a awm fo. Bungbel bal leh thianghlim lo anih tlat chuan, hman theih tho mah se hman tlak a nilo. No bal deuh a thingpui kan thlit chuan in a chakawm loh. No hman theih nazawng hi hman tlak a ni kher lo thei anih chu. Hman tlak, hman theih bawk hi a hlu a, a tangkai bawk. Chu chu kan nihna tur pawh a ni.

Ringtu zingah pawh hian, mi hmantlak tak tak tur tam tak hi Pathian tana hman theih loh, Kohhran tana hman theih lohin kan awm fo thin. Pathianin thiamna leh theihna min pekte hi min petu Pathian hman theih tura kan pek a pawimawh em em a ni.

‘LALPAN MALSAWM RAWH SE’