Chhandamna tluantling chang turin
Pian Thar a tawk lo
Rev. Lalhmingchhuanga Zongte
(He Article hi Baptist Pastor zinga ka mi ngaihsan ber te zinga mi Rev. Lalhmingchhuanga Zongte lehkhabu ziah, “Chhandamna tluantling chang turin Pian thar a tawklo” tih atanga Bung I na leh Bung II na tlem ka lakchhuah a ni a, a chhiartu ten hlawkna in hmuh ngei ka beisei. Chhiar chhunzawm duh tan a lehkhabu hi lei ngei turin ka suggest a che u. Leitur in hmulo anih chuan hawhtur ka kawl e. Tin, Article hi Copyright ka neilo a, a ziaktu hian remove tura min ti anih chuan remove ka in ring reng e. – LS)
Kan chenna khawvel hi fangchhuak ta vek ila, Mizote ang tluka piang thar nasa leh piang thar ngun hi hnam chi khat tal kan hmu ang em le? Kan hmu lo hial maithei. A nih loh leh, Mizo piang tharte tluka tlu leh hma hi an awm ang em le? An awm mai thei e. Kan hre vek lo. An lo awm anih pawhin an nikhua lo ve hle tihna a ni ringawt ang, inhnemna tlak chu an ni hauh lovang.
Kohhran tam tak chuan Camping/Crusade hi kumtin kan nei thei a, Kum khata vawihnih vawithum neite pawh kan awm ta fo mai. Camping kan neih apiangin kan hlawhtling thawkhat viau zel bawk a. Thla hnih thla thum hnuah chuan a mawi tawk Camp lut tur hi kan hmu leh thei reng tho bawk a. Kan rilru tak tak hi puang duh ta ila, Camping kan neih lai la la pawh hian “Eng chen tak daih leh hlawm ang maw?” tih hi a ni fur mai thei a ni.
Piang thar zawng zawng hi an tlu leh hma vek chu a ni bik lova, tun dinhmuna Kohhran Upa tha tak takte hi engtik lai emawa Camping/Crusade-a lo piang tharte an awm ve tho mai. Amaherawhchu, a tam zawk kan tlo zo ta lo em em mai hi a manganthlak a ni. Hetianga piang thar tlo lo tak takte hi, an pian thar dan a chiang lovin, a suak vekin an lo inhlan thin em ni ang? A then chu an lo ni anih pawhin chutiang vek chu an ni thei bikin a rinawm lo.
Zoram Kohhrante hi kan kalsual ta em ni? Khawi laiah nge bul kan tan that leh tak ang? tia kan inthlirlet ngam a ngai ta anih hi.
“Pian thar” tih leh “Piang thar” kan han tih teh chuk hi, Bible han chhiar chian hian, chuti tehpui chu a lo ni lem lo! Mizo tawnga Bible lehlinna ah leh kan nitin tawngkamah kan lo hmang thang laklawh si a, he lehkhabu ah pawh hian kan han hmang ve ta ngawt a ni a. Isua tawngkam John 3:3 thu “….mi tupawh an pian thar loh chuan….” tia Mizo tawnga kan lehlin hi Johana’n a ziak dan dik tak chuan (Greek tawngin a rawn ziak a, a chhiar dan tur a rawn ziah ang hian ka lo ziak mai – LS) ean me, tis gennethe anawthen tih a ni a, tihian a awmzia sawifiah lo tum ila :
Thu mal hnuhnung ber ‘anawthen’ tih khi anaw tih atanga lo kal a ni a, chu chu chunglam tihna emaw, a chung tihna emaw a ni a, a bultanna emaw, a tobul sawi nan an hmang bawk.
He lai thu hi saptawng chuan unless someone is born again ti te in an let a, chu chu mizo tawng chuan ‘mi tupawh a pian leh loh chuan….’ tiin a leh theih ang. Greek tawng atanga a ngial a ngan deuh va lehlinnaah chuan, ‘without being born from above’ tih a ni a, chu chu mizo tawng chuan ‘…chung lam atanga hrin a nih loh chuan’ tihna a ni. John 3:7 thu a ‘…i pian thar tur…’ tih lai thu a ‘pian thar’ pawh kha chutiang tho chu a ni.
Hei bak ‘pian thar thu’ reng reng Bible-ah kan hmu lo. I Pet 2:2 ah khan Petera’n ringtute a fuihna ah “nausen piang tharte angin thlarau lam hnute engmah pawlh loh chu chak rawh u” tih a sawi a, heta ‘piang thar’ tawngkam a rawn hman hi chu ‘pian thar thu’ tuna kan sawia hi ni lovin, nausen piang hlim (pianna reilo) sawina a ni tih kan chiang vek awm e.
