Rinna: Pathian Tihlawmna Kawng Awmchhun

Rinna: Pathian Tihlawmna Kawng Awmchhun

Lawmsanga Pautu

(Nimahsela, rinna lovin ama lawm zawng mi nih rual a nilo; Pathian hnena lo kal chuan, ani chu a awm tih leh, zawngtute hnena lawmman pek hmang a ni tih rin tur a ni.) – Hebrai 11:6

Hebrai ah chuan rinna chu ‘thil beiseite awm ngeia hriatna, thil hmuh lohte hriatfiahna’ tiin a hrilhfiah a. Rinna kan tih hian thil tam tak a huam a :

            # Ring – thil rin tlatna leh awih hmiahna (believe)

            # Innghahna – thutak a ni tiha innghah ngamna (trust)

            # Thuawihna – thiltihin a zui ngei ngei (obey)

            Mizo zingah rinna avanga khawngaihnaa chhandam kan sawi uar hle a. Kan tih ve lam anih loh thu te, ring mai tur kan nihna te kan sawi vul a. A uar uchuak ho phei chuan ring thei pawh kan nilo, ti thlengin mihring tih ve lamin awmzia a neih loh zia an sawi thin. Mahse, hetiang hmanga kan piantharna hian rei a daih lo fo mai. Heng ang ‘rinna’ ni a kan vuah hian rinna Bible-in a sawi hi a thleng pha lo a. “Ka ring vek a lawm”, tiin anmahniah engmah hmuh tur a awm lo a, an nun pawh a ti danglam phalo.

            Rs. 100 pek pawha lawm tur kha chatuan nunna Lal Isuan min pe tih ring si, lawm chuang silo, nun danglam si lo an awm thei hial angem. Ramhuai rinna ang vel lek a ni –‘Ramhuaite pawhin an ring a, an khur thin a sin” (Jakob 2:19) – Hetiang rinnaah hian nun pekna, Pathian thuawihna, nun danglamna tak tak a thleng lo. Chuvang chuan, ‘ring’ kan tih nazawng hi ‘rinna’ tak tak a tling lo. Pathian leh a mi tirh Krista rinna tak takah chuan inhlanna, innghahna a tel a, thuawihna a tel a, inpekna a tel a, nun a khawih che a, thiltih chu a serh zinga a mei ang a ni.

            Rinnain a ken tel tlat, rinna awmnaa awm ve zel Hebrai 11 atang hian en dawn ta ila, rinnaah kan awm em, Bible-in rinna a tih hi kan nei tak tak em? tih kan inhriatfiah nan a tha hlein ka hria.

1. Rinna chu Pathian nena lendunna a ni – Enoka chu Pathian nen an lengdun thin a, inkawmin fellowship neiin kum 300 chhung an awm (Gen. 5:22,24). Pathian nena kum tam tak lengdun chu an induh tawn hle ang tih a hriattheih. Pathian hi kan duh hle a tul, Pathian hi duhlo chungin a rin theihloh, ‘Pathian ka ring’ kan tih chuan ‘Pathian hi ka duh a ni’ kan tihna a ni. I rilru chhungril bera, fim taka i inngaihtuaha Pathian hi i duh tlat chuan amah i ring tihna pawh a ni.

2. Rinna chu innghah pumhlumna a ni – Israelfa ten Tuipui sen an kan dawn lai leh Jeriko an tih chhiat dawn khan rinna awmzia chu fiah takin kan hmu (Heb. 11:29-30).

3. Rinna hian tuarna a keng tel – Mosia tuarna chungchang Heb. 11-ah hian kan hmu a (24-26). Mithianghlim tam tak tuarna pawh kan hmu bawk. Rinna nei tak tak chu Lal Isua avangin eng tuarna emaw chu an nei ngei ngei thin.

4. Rinna hi Pathian malsawmna hnar a ni – Pathian lam thil reng reng hi chu tuarna maiah a tawp ngailo a, malsawmna a awm zel. Heb. 11: 32-35 kan en hian rinna nei hote nun ropui leh awhawm tak kan hmu a ni.