SECRETARY LIAN-A

Zohnuaiah hian kei tluka mi felfai lo, thil chhinchhiah thlip thlep peih lo leh mi viak tha lo hi an tam vak bik kher lovang. chutihlaiin, kei, mi a zawnga felfai lo ber mai hi Kum 2 zet a zawn in khawtlanga pawl lian ber mai Branch YMA a Secretary leh Unit TKP Secretary ah min thlang ve tlat mai.

Kum 2017 khan Branch YMA Secretary ah hian min thlang ve a, ka tlin loh zia ka hriatchian em avangin a kum leh ah theihtawp in ka in pha ve a, mahse Asst. Secretary ah Kum 2018 atan thlan ka ni ta tho.

Kum 2019 leh 2020 pawh theihtawp a ka inpha chungin Secretary ah a zawnin min thlang leh. Khawtlang rawngbawlna ah hian kei tluka tling zo lo, min thlang lui tlat hi hriatthiam harsa ka ti thin khawp mai.

Tin, TKP lamah hian Zohnuai East Unit ah hian Kum 2019 leh 2020 ah unit Secretary ah min thlang ve ve bawk a, YMA ringawt pawh a hautak tawh laiin, TKP nena Secretary hna han kawp meuh zawng…. zan awl ka nei ngailo tih hian a sawifiah deuh ber awm e. Secretary Lian-a ti a min ko fiam pawh an awm thin reng a ni.

Branch YMA a Secretary nih hian ken tel a ngah khawp mai. Department lam atang leh pawl hrang hrang atangin, by designation a telna tur a tam viau mai. Committee peng hrang hrang 10 chuangah hian tel ve a ngaih phah. Tin, Ex-Officio in Section YMA ah tel a ngai bawk si, kum 2020 ngat phei chu Covid19 hrileng avangin VLTF ten Duty turin YMA an rawn ruat a, tichuan YMA hmingin Zing atanga Zan thlengin Ni 97 zet mai kan Duty. In ah hian ka awm ve zeuh zeuh a ni ber.

TKP lama Secretary pawh hian ken tel a ngah khawp mai a, Unit hnuaia Committee peng hrang hrangah Ex-Officio in kan lut nghal si. Zankhat ah hian YMA lam nen, Committee pathum, tel ngei ngeina tur te neih chang ka nei ve thin. Zan awl hi a awmlo a ni ber e.

Khawtlang hruaitu, a bikin YMA ngat phei hi chu mawhphurhna a sang bawk a, khawtlang kan lo thianghlim lehzual theihna tura theihtawp a hma han lak ve chuan, min haw tu, min ngei tu hi an tam em em mai a, hmelma tam tak hi lohtheihlohna avangin kan insiam a ni ringawt. Buai reng rengin hun kan hmang ve a, mahse min haw em em tu engemawzah ka neih phah thung.

Chutihlaiin, ka lawm ve em em na chu, hetia buai reng renga hun hmang theia damna tha Pathian in min pe hi a ni. Damna tha nei ta lo ila, hetiang hian buai em em thei ka ni dawn silo. Tin, ka chhungte hi ka fak em em bawk. engkim ah min support a, In lama tih tur tul tam tak pawh hi ti theilo leh ti hmanlo hian ka khawsa kumtluan chu a ni mai a, amaherawhchu han in sawiselna lam vawikhatmah a ri ngailo. Min support em em zawk hi ka chhungte chungah pawh ka lawm bawk a ni.

Pawl hrang hrang hian kalphung a nei ve a, TKP lamah hian a zawna Secretary nih theihna hi Kum 2 chiah a ni a, kum 2 aia tam post ngai chelh theih a nilo. Hei vang hian kumin chu a zo titih dawn ta a, kumthar ah chuan Pathian zarah dam te a kan awm anih chuan min lo thlan nawn leh pawh tum mahse a theih tawh chuangloh a, buai reng renga kumtluan hun hman a ngai tawh dawn biklo.

Tuna ka hun hmandan hi Pathian zar ah dam te a kan awm a, nupui fanaute ka la nei ve anih chuan, chumi hunah chuan ka fate bulah Khawtlang rawngbawlna leh Kohhran huangchhunga rawngbawlna pawimawh zia te ka la hrilh hre ve thei turah ngai ta ila, he Post hi kum tam tak a liam hnu a la chhiar let ve theih tur atan ka han dahtha ve hrim hrim ange.