SIKKIM TRIP PART 1

SIKKIM TRIP PART 1

Lawmsanga Pautu

Kan Office, DRDA Lunglei Project Director Pu K. Lalrohlua zarah kan Room (MIS Team) ten Dt. 24^th November, 2019 atanga 1^st December, 2019 inkarah Sikkim tlawh in hun hlimawm tak kan hmang thei a, he kan zinna atana theihtawp min chhuahsak tu kan Pu chungah hian lawmthu kan sawi tak meuh meuh a ni.

Sikkim tlawh tur hian MIS Team mi 8 te, Pu PC Malsawmtluanga (Pu Mala), Pu T. Lungawipuia (Pu Awitea), Pu HS Lalchhanhima (Pu Lcha), Pu Lalringngheta Chawngthu (Pu Tepuia), Pu Samuel TH Lalhmangaihzuala (Pu Samu-a), Pu PT Lallawmsanga (Keimah 😊 ), Pi Lalnunhlimi Chhakchhuak (Pi Manuni) te leh kan Nodal Officer Pi HK Lalrintluangi (Pi Tluangtluangi) te thawkchhuak in, kan zingah hian MIS Staff tho Pu R. Lalrammuana (Pu Duata) leh Pu C. Lalrammawia (Pu Rammawia) te erawh harsatna avangin an rawn tel theilo thung. (Office in kohna anih avangin Pu leh Pi ang veka hming hi dah a ni, Nula leh Tlangval deuh vek kan la ni thung e.)

Dt. 24^th Nov ah Lengpui atangin Guwahati flight a ni a, Guwahati ah Flight change niin kan tum ram pan zelin Bagdogra airport dar 4:30 PM velah thlen a ni. Tichuan Bagdogra airport ah Xylo motor hire in by road in Gangtok pan a ni a, zan dar 9 pelh hlek ah Gangtok hi thlen a ni. Gangtok ah hian kan Hotel biak sa Hotel Ninamma (Pure Veg) ah lut nghal in a hotel room a nuam in a thianghlim khawp mai. Amaherawhchu Pure Veg a nihna ah hian Dinner erawh kan thlen chhungin vawikhatmah kan ei lo! 😊

Dt. 25^th November ah hian nilengin Gangtok hmun vela Tourist Place hrang hrang (Banjhakri falls, Ropeway, Namgyal Institute of Tibetology Museum, Do drul chorten monastery, Tashi Viewpoint, Handicraft handloom etc.) te tlawh in, taksa chau hnep in kan thlenna Hotel ah tlai dar 5 velah let leh a ni. Chutihlaiin kan Nula te pahnih erawh a tukleh lama kan kalna tur atana Travelling Agency (Sikkim Darshan Travels) hnena Permit vel ti felin an lo chhuak bo leh daih tawh thung. Anni pahnih hi hmeichhia ni siin kan zin chhung zawnga kan engkim a engkim an ni ringawt. Taksa chauh pawh an nei ve ngailo emaw tih turin an kal kual pawp pawp a, engkim an buaipui ti ila, kan sawisual tam lo viau ngei ang. Tichuan zan lamah kan thlenna Hotel atanga ke a minute 10 kal vel, MG Marg han tlawh ve in Mahatma Gandhi lim bulah te thla te kan han la ve a ni. Zan lamah Dar 9:30 velah kan thlenna hotel chhak lawka Nepali Hotel ah Dinner eiin nikhatna hun kan hmang zo.

Dt. 26^th November hian Sikkim kan kalchhan ber pahnih, District Office, Mangan hmun tlawh leh Zero Point – Yumthang Valley, Vur awmna hmun vel kal turin kan inpuahchah a, zing dar 7 ah thovin kan Luggage te kan pack fel vek hnu in zing dar 8 chiah chiah ah Travelling Agency kaltlanga kan biak motor pahnih (Toyata Innova ve ve) kan Hotel kawt ah rawn ding in, Police Permit Cell ah min luhchhoh pui nghal a, kan kal tumna hmun hi China Border anih avangin Restricted/Protected area anih angin Permit tifelin darkar chanve vel hun kan hmang.

Tichuan kan tum ram panin kan kal ta char char a, zing Dar 10:30 velah Tumlong Village thlengin, hetah hian Mr.Nampatang, Gram Rojgar Sevak (GRS) in min lo dawngsawng a, Office hna chungchang te min kawhhmuh hnu in Mangan pan niin District Office hi dar 1:30 velah thlen a ni. Amaherawhchu kan kalni hian Social Audit neia Office staff te an lo chhuah vek avangin thla te kan la a, Zero Point hmun pan turin kan chhuak leh. Zero Point hi ala hlat deuh avangin Lachung hmun a zan riak turin ruahmanna siam sa a ni.

Lachung thlen hma hian kawngthlang lamah Chungthang khaw thlen hma in Teesta tuikhuah mawi lutuk tak mai, rawng hring vek kan hmu a, mi tam takin thla lakpuiin an lo ding sup sup mai a, keini pawh ding ve in darkar chanve vel zet hun kan hmang. Tichuan kal zelin tlai dar 5 velah Lachung thlengin, kan thlenna tur Hotel (Tsomo La Guest House) ah luh nghal a ni. A boruak a vawt khawp mai a, kan kal hunlai hi Sikkim climate ah khawvawh in tan chhoh tak tak hma, Vur tlak hma a ni a, March, April thla velah phei chuan Vur a tla nasa viau thin a ni awm e. Chutihlaiin zantir ah ringawt pawh 4/5 degree celcius vel niin, khawvawt tuar ngailo tan chuan tawrh a har khawp mai.

He zan, Lachung Hotel (Tsomo La Guest House) a kan riah zan hi ka damchhunga ka hriatreng tur thil ka tawn zan a ni tlat mai. He zan tluka ka nuih nasat hi ka la hre lo hial ang. Thian ho kan han infiam nak nak a, Secondhand Bale rim tih vela kan nuih laiin kan thianpa pakhat room ah a rawn lut a, Kuhva rah lian ber a rawn hmawm hmak a, a duh aiin alo chang ta sia, a la chhuak a, a hru hul nawk nawk a, Kuhva rah bawm ah a khung. Chutihlaiin kan thianpa pakhat dang rawn lut in a ni khan uluk tawka Kuhva rah thlangin, kan thianpa hmuam hnu kha tifuh inti tak maiin a han hmawm hmak mai a, nuih a kal ta laklawh aniang, kan thianpa pakhat earphone ngaithla, thusawi dang hre vek, tih tur an hrilh erawh hre lo der ta char char thlengin. Pum na vekin khami zan kha hun kan hmang.

(Part 1 chu duhtawk ta ila, Part 2 ah Zero Point – Yumthang valley a hun kan hman dan leh China Border area, Nathula kan kal chanchin te ziah a ni e. Tin, Part 3 ah hian kan haw lam chanchin, Siliguri leh Guwahati a kan hun hmandan te, kan haw lam chanchin nuihzatthlak lutuk tak mai ziah a ni a, Part 4 ah chhunzawm niin, Sikkim ka hmuhdan leh ka thil zirchhuah chungchang te, Thlalak fiah zawk a hlawm a download theih tur Link dah a ni bawk e.)