SIKKIM TRIP PART 2

Dt. 27^th November zingkar a ni a, khawvawt tak karah zing dar 6:30 ah thovin thiante ho ka han kaitho a, tichuan Breakfast te kan eizawh hnu dar 7 pelh hnu lawk ah Lachung atangin Zero Point pan turin kan motor hman pahnih in kan inzui chhuak.

Zero Point panna kawng, Yumthang Valley vel hi a mawi khawp mai a, Bollywood movie tam tak an lo shoot tawhna niin, Tlang hmun, hmun nuam tak mai a ni. Zero Point kan thleng hnai tawh tih hria in keimahni pawh kan hlim a, keini ai mahin kan Driver Arjun-a kha ala hot zawk lehnghal. Mizo hla play turin min ti a, mizotawng thiam iklo kha, a zawm nasa ber ber ah a tang!! The cassettes hla “Engtin nge ni dawn?” tih leh G’nie & Jeff hla ‘Rim Risk’ phei kha chu a duh dan danin a han phuahchawp a,  min play nawn tir chhen bawk nen, kan hlimpui khawp mai. Kha Driver anga friendly, efficient leh hna a chiang kha mi an tam vak kher awmlo e. Pu Awitea’n Shades a han bun a, Innova car pahnih lei a tum kan tih phei kha chuan Pu Awitea kha chu Kawngkhar a hawnsak lo chauh anih kha. 😊

Tichuan zing dar 9 velah kan hmuh chak em em, Vur awmna hmun Zero Point chu kan thleng a, Driver in uluk takin min hrilh sa thlap, Oxygen a tlem avangin tumah tlan loh tur, taksa tih hah loh tur tiin.  Amaherawhchu vawikhatna atana Vur awmna hmun han hmuh a, Tlang chung vel Vur in alo bawh var vek han hmuh meuh chuan Driver thusawi kha beng lehlam ah a chhuak nghal daih mai! Vur awmna lam panin kan tlan darh nghal sung sung a, midang an tam ve bawk si, kan inbo nghal deuh vek mai. Mahse kan tum hmun a in ang chiang bawk a, mi tam tak karah awlsam te chuan kan inhmu lehnghal mai bawk a! Phone signal hi Lachung kan thlen hma atangin a bo hmak!

Driver thusawi ang ngeiin, Oxygen a tlem bawk a, tawite han tlan pawhin thaw kan khamlo em em nghal a, taksa tih hah ngam anih loh zia a langchiang viau mai. Tichuan, riltam, tuihal leh phone signal neihloh tih vel lam rilru a awm miah lovin Vur awmna hmun ah chuan hun kan han hmang ta a, khua a vawt tih pawh kan hre manglo hial hlawmin ka hria!

Nuam ti hle mah ila, Programme plan fel sa taka hun hmang kan nih avangin haw leh lam tur rilru a dah chungin chhun dar 11 velah Zero Point kan chhuahsan. Zero Point an tih chhan hi ka hre bik chiahlo takna in Pu Awitea hian a video record ah hian sawifiahna ah ‘Zero Point hi a vawt em em a, Zero Degree aia sang anih ngailoh avangin Zero Point an ti’ ti a a sawi ka hre fuh pek a, ka ring nghal tawp. Ka Google buai dawn hauhlo hei chu.

Tichuan, Gangtok lamah haw tlang nghalin tlai dar 5 velah Gangtok hi thlengin kal lama kan innghahna Hotel Ninamma ah bawk zan riah a ni. Hemi zan hian a tuka kan awmdan tur relin meeting neih a ni a, thenkhat in Nathula Pass lama kal an chak laiin thenkhat in chawlh hahdam pah Office work khawih an duh deuh a, tichuan Pu Mala, Pu Awitea, Pi Manuni, Pi Tluangtluangi leh keimah te Nathula Pass lamah kalin hun kan hmang a, In lamah Pu Lcha, Pu Tepuia leh Pu Samu-a te hun an hmang thung.

Zing Dar 7 leh a chanve velah Nathula pan tur hian chhuah niin Darkar chanve chuang zet Permit tihfel hnu ah Dar 8 pelh hnu ah Nathula pan a ni a, kalkawng lakah inhnawh puar in Check Gate engemawzah alo awm a, China leh India ram inrina hmun anih avangin Security checking pawh an uluk khawp mai. Foreigner tan phei chuan helai hmun hi tlawh phalloh a ni awm e. Kalkawng ah hian Tsongmo Lake (Changu Lake) kaltlang niin haw lama tlawh haw tura dah in Scenery mawi lutuk, India ramah a awm ang tih ngaihna pawh hriatloh mawi tak tak tlan pel zelin a tawp ah Dar 12 vel chiah chiah ah Nathula hi thlen a ni.

Nathula hi sawitawh angin India leh China inrina hmun niin, step a chhoh in Building alo awm a, chutah chuan Fence dah in a lehlam chu China ram niin Tourist tam takin he hmun hi an lo tlawh ve bawk a ni. A hmun ah hian Mobile phone emaw, Camera Device hrim hrim ken phalloh bur a ni a, Security ten hnai deuh hlek atanga thlalak ringawt pawh an phallo.

A hmun hi tlangsang a Step a lawnchhoh ngai anih vangin thli a tam em em a, thli lah a vawt in Zero point ai mahin a vawt hial in a hriat. Tichuan, kan nula hruai pakhat Pi Manuni’n Security te uluk tak maia an duty thap laiin a ruka Thla lak a tum tlat vang te pawh a ni maithei, rei awm ngam lovin kan chhuk thla a, Duty te phal chin atangin duh ang tawkin thla kan la ta thung. He hmun ah hian India rama ATM Booth awmna sang ber (highest altitude) a awm bawk a, amaherawhchu a vawh em vang nge kan thiannu kan ven vang pawh ka hre ta ber lo. Kan hmang ta lo anih kha. Step chhuk thlak lam ah kal an phalloh na lai, Security ten uluk lutuk tak maia an ven thap na lai ah kher tu emaw chu a kal lui leh hram tih kha chu sawitel tawhlo mai ange. 😊

Tichuan, Nathula atangin let leh in Tsongmo Lake (Changu Lake) ah kan peng haw a, Yak alo awm teuh mai a, kan han chuan ve nghe nghe kha. He Lake hi a nuam in khualzin te pawh an tam em em a, helaia Yak vulh ho hian sumdawnna atan hmangin mawi takin an Yak te cheiin man chawiin khualzin te an lo chuantir thin a ni awm e.

Tsongmo Lake a darkar chanve chuang zet hun kan hman hnu ah Gangtok lamah kir leh in kan thlenna Hotel hi Dar 4 vel ah thlen a ni. Tichuan zan lamah thian za hovin Shopping hun te kan hmang ve a, Gangtok chhuahsan tawh tur kan nih avangin Sikkim hriatrengna tur thil hrang hrang te leikual in zan dar 10 velah dinner kan ei thei hram.

(Part 3 ah hian kan haw lam chanchin, Siliguri leh Guwahati a kan hun hmandan te, kan haw lam chanchin nuihzatthlak lutuk tak mai ziah a ni a, Part 4 ah chhunzawm niin, Sikkim ka hmuhdan leh ka thil zirchhuah chungchang te, Thlalak fiah zawk a hlawm a download theih tur Link dah a ni bawk e.)