SIKKIM TRIP PART 4

Part 4 i chhiar hma in Part 3 chhiar hmasa phawt la aw

Inthlahrun in awmzia a nei lemlo tih hre reng chungin, theihtawp a inla khawngaihthlak pahin “Kan thiante motor dangah an rawn kal a, an rawn thleng tep a, tin, kan thiante hei bungrua an buk dawn mek a, min nghak hram thei angem” tiin kan han dil leh ngial a, a ni chuan tuna rawn thleng tawh sa chu in kal thei ang, midang chu kan nghak thei lo tiin hrethiam hram turin min hrilh a, chutihlaiin Pi Manunin Pi Tluangtluangi a rawn call a, an rawn thlen thu a rawn hrilh. Pi Tluangtluangin phur lutuk tak maiin “Miss, kan thiante pawh an rawn thleng chiah anih chu” tiin a hrilh a, counter nghaktu te pawh tih ngaihna an hre tawh biklo, tunah Security check neihna ah kal nghal ru tiin Ticket min print sak nghal pawp pawp a, flight attendant pakhat rawn kalin kan Luggage min rawn khaipuiin “Hurry Up please, Hurry up” a rawn mawlh mawlh.

Bungraw excess, chawi belh in huam chunga kal e tilo chuan Luggage pawh min buk hman tawh lo, kan thlawhna tur GoAir a thawk ho, inchei nalh fe fe rawn kalin a remchang changin kan bungrua an rawn hnawhlut pawp pawp a,  security check nei turin min lo nghak thap.  Han tlan luh mai kan tum a, a beep nauh nauh mai, Belt leh Phone ka lo phawrh lo niin, ka hman tawhlo tiin ka tlan lut ringawt, min check tu pawhin min enliam ve ringawt tho. chutah luggage excess tam lutuk dawn avangin Hand baggage kan keng lian hlawm si, chu pawh mumal takin an check hman chuanglo. Chutah thian thenkhat khan Kawnghren vel an lo phelh thlap thlap niin, kan han innghak kual, a remchang changin kan bungraw hmuh hmuh bag ah kan khung a, Flight Attendant pakhat khan min rawn guide in, hmanhmawh taka zui turin min rawn ngen. Tichuan, thlawhna hian keimahni chiah min nghah tawh avangin Bus awmna thleng chu tlan hlir in kan va tlan phei a ni ber e.

Bus awmna kan va thleng chu keini nghak turin a hranpa in Bus an lo tir let leh niin, Bus chhung kan lut chu kan thaw huai hlawm. Keini ai mahin a thawktu te kha an hmanhmawh hial in kan hria. Thawveng huai chungin kan Bus driver hnenah a kal theih kan han ti kha mi pakhat, a thawktu hi hmanhmawh lutuk in a rawn tlan a, Mobile phone pakhat a awmlo tlat, in khung tel em a rawn ti. Keini lah hmanhmawh lutuk, hmai sen, thlan hluam in kan lo awm a, mahni bungrua tumah in ak ta lo chu, kan bag vel kan han hai kual leh a, security check ah khan kan hmanhmawh lutuk in bungraw awm zawng zawng kan lo khawm vek a ni awm e. an phone pawh pakhat in alo khung a, a thawktu te pawh an nui ringawt. Kan hmanhmawh zia min hriatpui chiang bawk a, nui sang chungin lawmthu min hrilh a, min kalsan.

Tichuan, kan thlawhna tur Flight kan va thleng, a hnunglam an lo khar tawh, a hma lam kawngkhar chiah hawngin keini chiah min lo nghak tawh si, thlan hluam, hmai sen vek chungin flight a chuang zawng zawng hmuh tur in a hnung ber pawla thu tur chuan a hma atangin kan lut zui anih kha. Kan Hand baggage a lian hlawm bawk si, khuk ral hi a chakawm duh khawp mai. Flight chuang ve dang zawng zawng kal pelin a hnung ber pawl ah kan va in khailut, an flight delay chhan ho kha Burma sumdawng ang maiin kan bawr bawk si. Zahthlak duh khawp mai.

Dar 1:15 a thlawkchhuak tur flight hi dan tlangpuiin dar 1:10 velah runway ah a tlan tan tawh thin a, amaherawhchu keimahni ho vangin Seat a ka thut chiah khan Sona ka bih nghal a, Dar 1:25 vel a ni. Keimahni vangin Flight an delay, a chhuanawmloh viau laiin khatiang kha ka tawn leh tawh ka ring lemlo bawk a, kawng lehlamah chuan vawikhat dam mana Flight han delay tir tu nih ve hrim hrim pawh kha sawitur a ti tam ti tawh mai ang.

Tichuan, Lengpui kan thleng a, Miss Nunui Rualhleng kan hmu lehnghal a, thla te kan lakpui kha. Lengpui ah Motor kan dah sa avangin Bungrua load sawk sawkin Lunglei kan pan nghal a, zanrei ah Lunglei thlengin kan Sikkim kal chu tluang takin kan haw ta a ni.

SIKKIM KA HMUH DAN :

Sikkim hi keima tawkah hmuhdang hrang hrang ka nei ve a, a point te te hian dah ta ila, chhiartu te tan chhiar a nawm zawk ka beisei.

1. FAINA : Sikkim han thianghlim zia leh fai zia hi ka theihnghilh thei tawh lovang. Plastic Free zone an nei teuh mai, Plastic lam chi engmah an phallo. Hei hian an ram an vawn uluk zia leh enkawl uluk zia a langchiang. China Border area kal tur hian ramhnuai, kawngchhe tak tak, ramngaw tlan tlang a ngai. Hetiang ramngaw hmun ah pawh hian bawlhhlawh motor atanga paihchhuah hrim hrim an phallo tawp mai. Driver, tawng huatthu nilo se, lehkha thiamlo zawk lehnghal in Bawlhhlawh paihchhuah phal anih loh zia te, motor a dustbin a dah ah bawlhhlawh paih zel tur te in min hrilh thlap. He thil hian ka nun ah thu a sawi nasa viau mai, ka haw veleh car dustbin ka lei ve nghal hmak mai.

Tin, Faina chungchang ah bawk hian, ramhnuai a kan tlan lai, ramngaw taka kan tlan laiin kan zun a chhuak a, Driver in kawngsir a zun a remti chuanglo. Faina hi an nunpui zia a ti langchiang khawp mai.

2. TOURIST PLACE : A chei theih hrim hrim chu an chei vek emaw tih tur khawp in, luiluang ho te te thlengin mawi lutukin an chei vek a, tourist hmunpui ah hmangin sum lakluh nan an hmang char char mai. Sikkim kan thlen tirh a nikhat ni a Gangtok a kan hun hmanna ang zawng zawng kha a aia mawi leh tha zawkin Mizoram ah hian neih ve theih vek niin a lang. Tourism department te hmalakna that zia leh an sawrkar in a ngaih pawimawh zia a lang. Tin, Gangtok ah hian Hotel hi a in tlar phei deuh vek hial mai. Hotel tam zia hian Tourist tam zia a tilang chiang viau mai.

3. HMEICHHIA TE ZALENNA : Sikkim ah hian hmeichhia te an zalen viau niin a hriat a, zan ah tleirawl leh nula te MG Marg velah an chhuak luih luih a, Hmel danglam pu te an notice hranlo a, zalen takin hun an hmang. Bengali vai kan tih hovin a chiah tam vak biklo bawk nen, India ram hmun nuam a tling a ni.

4. ZU CHUNGCHANG : Sikkim hmun hi a vawt em em a, Border area ho phei chu a vawt lehzualin, hemi vang te pawh hi anih hmel. Zu hi hmun tin ah leitur a awm ti ila, kan sawisual tam pui lovang. Khawlai thil zuar satliah, Hawkers kan tih ang chi te, dawr te reuh te te thleng pawhin Zu tlem a zawng hi an kawl zel mai. Amaherawhchu kan cham chhung khan kan chhuak kual nasa viau a, zu rui tumah hmuh tur an awmlo. Mizoram mipui tam tak hian an lakah zirtur tam tak kan nei niin a lang.

Heti zawng hi Sikkim trip atan chuan ka ziah theih nise, a hnuaia Link atang hian Thlalak Original Quality download theihin a awm a, amaherawhchu thlalak te hi hmundanga thehdarh phal a nilo thung ang.

Album 1 : https://photos.app.goo.gl/gkbYVCELN4UeRqXbA

Album 2 : https://photos.app.goo.gl/XhzsHMVCoXdcGibp8

Album 3 : https://photos.app.goo.gl/4X6gPa7fkhJjWhhc7

Album 4 : https://photos.app.goo.gl/GtBv7hmrn9JG1Ma47

Album 5 : https://photos.app.goo.gl/ohD92yEDXac84onz6