THULOVI THU LEH KEIMAH

Twitter lamah kan thiannu pakhat Tanpuii Ralte fleets pakhat, lehkhabu kawm “Thulovi Thu” tih ka hmu chu a Title ka hmuh rualin ka mit a la nghal zar mai. Engvanga Thulovi inti nge anih ka hriatchak rualin, Thulovi Thuchhuak chu ka chhiar chak nghal ngei mai.

Keimah hi post hmasa lam deuh a ka sawi tawh angin, buaina neuh neuh hi ka ngah ve thin khawp mai a, kohhran, khawtlang leh mimal eizawnna avangin chhun/zan zawm hian ka buai ve reng thin. hunawl pawh nei hman iklo khawpa buai thin ka nih ve avang hian “mi te chu Lalbuaia te an nia, kei erawh hi chu ‘LALLOBUAIA’ ka ni” tiin ka sawi fiamthu thin.

He Title “Thulovi Thu” tih ka hmuhrual hian keimah nen in hmehbel in, chhiar ka chak ngei mai. Tichuan, fb lamah a theih ang anga ka han zawnkual hnu in a ziaktu ngei chu ka va hmuchhuak ta a, amah kaltlangin a lehkhabu chu ka lei ve.

Lehkhabu ka lei rualin rang takin ka han keu nghal zung zung a, ka hriat chak ber chu Ziaktu Thuhma ah ka hmu ta nghal. Engvanga Thulovi inti nge anih ang tih zawhna chhanna ka hmu ta.

He lehkhabu ziaktu hi Gladys Lalhruaitluangi niin, a chanchin ka hre lawksa bik lo. Amaherawhchu a thuziak ka chhiar atangin Nula la upa lo tak mai a ni tih erawh ka hria. Tin, a cover hi Blue Barb Tlau kutchhuak niin, a bu ka chhiar hma in ngun tak leh uluk takin a cover hi ka en a, a Cover photo hian thil a sawi thui khawp mai.

A bu ka han chhiar a, Hla thu ril kan tih ang chi 116 zet lo awmin, awmze nei, kalphung nei taka rem vek a ni. A ziaktu hian ama chanchin atanga bul rawn tan chhovin, ngaihzawng a tawn fuhloh chungchang rawn ziak in, an inthen hnu pawha ala theihnghilh tak tak theihloh dan te, rilru na tak chunga a hun hman dan te, amaherawhchu Pathian remruatna alo nih chhoh zawk zia te hla thu hmangin a rawn tarlang. A hringnun ah hian amah hian thu a neihloh em avangin Thulovi lo inti a ni e.

A bu chhung thu erawh detail takin ka sawi lo ang a, sawi dawn pawh ni ila, Hla thu hi ka thiamloh mai pawh nilo, a ngaihna ka hriatloh ber thil anih avangin sawi zau tur ka hre lo. Chutihlaiin he lehkhabu hi lei ve ula, a rhyme that zia leh kum 22 mi lek kutchhuak atan chuan awih awmloh khawp hial anih zia in hmu ve ngei ang.

He lehkhabu chhung thu a ka duh thenkhat lai hi lo la chhuak ta ila.

Ziah zawhloh phek a tam a,
Chhiar nawn atan a mawi hek lo

Dam lovin ka na ta sa sa,
Nui lovin ka ngui ta sa sa,
I reh ri chu ka bengchhenpui ang a.
Reh ri chu ka tleipui turin
Reh ri ka lo chhuah bengchheng ve chel chul ang e.

Thawnthu tawpna ah lang ve tawh lo mah la
A ngaihnawmna ti zual tura i lo lan ve vangin
Ka lawm e.

Thawnthu thar chu awm tawh mahse maw
He thinlung chimawm hian
Thawnthu hlui chu a la ngai fo

Hriat reng tlak loh;
Theihnghilh theih si loh.
Chelh tlak loh;
Thlah theih si loh……

Hliamtu awm lovin hliamin ka awm a,
Velh lovin mittui nen zan hun ka hmang leh ang.

I bul hnaiah cheng mah se, i kiangah an cheng lo a.
An thawm hre mah la, an ri i bengkhawn lo.
An vul hun chu an chuai ber hun a ni a.

Ka bia che anih chuan,
Ngaithlatu ka mamawh vang a ni tih hria la.

Mahni i inen fiahna tarmit aiin
Midang i thlirna tarmit i vuah ngun zawk a
I buai anih kha.

Zir thiam theih tur tawk lek hringnun anih loh vang hian
Nunpui tlak hringnun a ni zawk e.

A tumruhna ropuizia an hriat theihna turin
A beih nawn tura hlawhchhamna chu pek a ni.

Bu khat hi Rs. 100 man chauh a ni bawk a, ka blog lo chhiar fuh in awm anih chuan lei ula, in inchhir lo khawp ngei ang. Ka lawm e.